سندھ میں ہندو طلبہ کے لیے مذہبی کتب کی اشاعت کا فیصلہ

سندھ میں تعلیمی نظام کو مزید جامع بنانے کے لیے ایک اہم پیش رفت سامنے آئی ہے جس کے تحت سرکاری اسکولوں میں زیر تعلیم ہندو برادری کے طلبہ کے لیے ان کے مذہب سے متعلق درسی کتب شائع کی جائیں گی۔

یہ فیصلہ وزیر تعلیم سندھ سید سردار علی شاہ کی ہدایت پر کیا گیا ہے جس کے تحت سندھ کے سرکاری اسکولوں میں ہندو طلبہ کے لیے مذہبی تعلیم کی فراہمی کا باقاعدہ آغاز کیا جا رہا ہے۔

سندھ ٹیکسٹ بک بورڈ کے مطابق جماعت 3 سے 5 تک کے ہندو طلبہ کے لیے مذہبی کتب تیار اور شائع کی جائیں گی جو آئندہ تعلیمی سال 27-2026 میں تقسیم کی جائیں گی۔

یہ فیصلہ سندھ کریکولم کونسل کی ایگزیکٹو کمیٹی کے اجلاس میں ہندو برادری کے نمائندوں سے مشاورت کے بعد کیا گیا ہے۔ حکام کے مطابق اس وقت سندھ بھر کے سرکاری اسکولوں میں تقریباً 129,119 ہندو طلبہ زیر تعلیم ہیں جن میں سب سے زیادہ 26,642 طلبہ ضلع تھرپارکر اور 21,584 طلبہ عمرکوٹ سے تعلق رکھتے ہیں۔

تعلیمی حکام کا کہنا ہے کہ اس اقدام کا مقصد مذہبی رواداری کو فروغ دینا اور تمام طلبہ کو اپنے عقیدے کے مطابق تعلیم کے مساوی مواقع فراہم کرنا ہے