ملک بھر میں بغیر اجازت نئی یونیورسٹی یا سب کیمپس کے قیام پر فوری طور پر پابندی عائد کر دی گئی ہے۔ہائر ایجوکیشن کمیشن (ایچ ای سی) نے اس حوالے سے اہم فیصلہ کرتے ہوئے تمام یونیورسٹیوں کے وائس چانسلرز اور سربراہان کو باضابطہ طور پر آگاہ کر دیا ہے۔ خط میں واضح کیا گیا ہے کہ اجازت اور مکمل اسکرونٹی کے بغیر کوئی نیا تعلیمی ادارہ یا ذیلی کیمپس قائم نہیں کیا جا سکے گا۔
ایچ ای سی کے مطابق اب کوئی این او سی یا ایکریڈیٹیشن جاری نہیں کیا جائے گا اور نہ ہی ایسی یونیورسٹیوں کی ڈگریوں کی تصدیق کی جائے گی جو قواعد پر پورا نہیں اترتیں۔
کمیشن نے تمام جامعات کو ہدایت کی ہے کہ وہ نئی پالیسی پر سختی سے عمل کریں۔ فیصلے کی وجہ غیر معیاری تعلیم، اہل اساتذہ کی کمی، ناکافی سہولیات اور کمزور انفراسٹرکچر کو قرار دیا گیا ہے۔
خط میں تحصیل کیمپسز میں پی ایچ ڈی اساتذہ اور طلبہ کی کمی پر بھی تشویش ظاہر کی گئی ہے جبکہ اساتذہ کی بھرتیوں، تعمیراتی سرگرمیوں اور نئے کیمپسز کے لیے زمین کے حصول کے عمل کو فوری روکنے کا حکم دیا گیا ہے۔ایچ ای سی نے خبردار کیا ہے کہ خلاف ورزی کی صورت میں متعلقہ کیمپسز اور پروگرامز کی منظوری معطل کی جا سکتی ہے۔
